मोदीले तोडे नेहरूको ऐतिहासिक रेकर्ड, निर्वाचित प्रधानमन्त्रीका रूपमा पूरा गरे १२ वर्ष

भारतीय प्रधानमन्त्री नरेन्द्र मोदीले निर्वाचित प्रधानमन्त्रीका रूपमा १२ वर्ष पूरा गर्दै जवाहरलाल नेहरूको ऐतिहासिक रेकर्ड तोडेका छन्। यस अवसरमा एनडीएले दिल्लीमा विशेष बैठक आयोजना गरेको छ।

प्रधानमन्त्री नरेन्द्र मोदीले निर्वाचित प्रधानमन्त्रीका रूपमा ४३९९ दिन पूरा गर्दै जवाहरलाल नेहरूको रेकर्ड तोडेका छन्। यस अवसरमा एनडीएले दिल्लीमा उच्चस्तरीय बैठक आयोजना गरेको छ

नयाँ दिल्ली। भारतीय प्रधानमन्त्री नरेन्द्र मोदीले देशको राजनीतिक इतिहासमा नयाँ कीर्तिमान कायम गरेका छन्। मोदी नेतृत्वको केन्द्र सरकारले १२ वर्ष पूरा गरेसँगै उनले स्वतन्त्र भारतका प्रथम प्रधानमन्त्री जवाहरलाल नेहरूको एक ऐतिहासिक रेकर्ड तोडेका हुन्।

निर्वाचित प्रधानमन्त्रीका रूपमा नेहरू ४ हजार ३९८ दिन पदमा रहेका थिए। मोदीले ४ हजार ३९९ दिन पूरा गर्दै उक्त रेकर्ड आफ्नो नाममा दर्ज गराएका छन्। यससँगै उनी स्वतन्त्र भारतमा निर्वाचनमार्फत चुनिएर सबैभन्दा लामो समय प्रधानमन्त्री पदमा रहने नेता बनेका छन्।

मोदी सरकारले १२ वर्ष पूरा गरेको अवसरमा भारतीय जनता पार्टी (भाजपा) र राष्ट्रिय जनतान्त्रिक गठबन्धन (एनडीए) ले देशभर विभिन्न कार्यक्रम आयोजना गरेका छन्। यही क्रममा नयाँ दिल्लीस्थित भारत मण्डपममा एनडीएको उच्चस्तरीय बैठक बसेको छ।

बैठकमा एनडीए आबद्ध ३५ दलका करिब ७५ जना वरिष्ठ नेताको सहभागिता रहेको छ। कार्यक्रममा विभिन्न राज्यका मुख्यमन्त्री, उपमुख्यमन्त्री, क्षेत्रीय दलका अध्यक्ष तथा गठबन्धनका प्रमुख नेताहरू सहभागी भएका छन्। रक्षामन्त्री राजनाथ सिंह, गृहमन्त्री अमित शाह, भाजपा अध्यक्ष जेपी नड्डा तथा केन्द्रीय मन्त्री शिवराज सिंह चौहानलगायत शीर्ष नेताहरू बैठकमा उपस्थित छन्। त्यस्तै, एनडीएका सहयोगी दलका नेताहरू के. राम मोहन नायडू, राजीव रञ्जन सिंह, एचडी कुमारस्वामी र अनुप्रिया पटेल पनि कार्यक्रममा सहभागी भएका छन्। बैठकमा आगामी राजनीतिक रणनीति, संगठन सुदृढीकरण तथा सन् २०४७ सम्म भारतलाई विकसित राष्ट्र बनाउने लक्ष्यबारे छलफल भइरहेको बताइएको छ। साथै, जनजीवन सहज बनाउने, व्यवसायिक वातावरण सुधार गर्ने तथा राष्ट्रिय विकासका ठूला पूर्वाधार आयोजनाको प्रगतिबारे समीक्षा गरिने एजेन्डा तय गरिएको छ। हालै मन्त्रिपरिषद् बैठकमा प्रधानमन्त्री मोदीले सरकार सन् २०१४ देखि सत्तामा रहे पनि अबको ध्यान भविष्यका लक्ष्य र जनकल्याणका कार्यक्रमतर्फ केन्द्रित हुनुपर्ने बताएका थिए। बैठकका क्रममा आन्ध्र प्रदेशका मुख्यमन्त्री एन. चन्द्रबाबु नायडूले प्रधानमन्त्री मोदीको नेतृत्व र उपलब्धिको प्रशंसा गर्दै विशेष बधाई प्रस्ताव प्रस्तुत गर्ने कार्यक्रम रहेको छ। उक्त प्रस्तावलाई नागाल्यान्डका मुख्यमन्त्री नेफ्यु रियोले समर्थन गर्ने बताइएको छ। प्रस्ताव पारित भएपछि प्रधानमन्त्री मोदीले एनडीएका नेताहरूलाई सम्बोधन गर्दै आगामी रणनीति र विकासको मार्गचित्र प्रस्तुत गर्ने कार्यक्रम रहेको छ।